Monday, September 20, 2021
اخبار العراق العاجلة من اكثر من مصدر

الإيمان

امي جانت تلح على بابا جيب احد يشتغل وياك جيب احد يشتغل وياك …. ابوية جان ميقبل و يكول اني…

By وكالة الاولى نيوز , in قصص من الواقع , at 26 أغسطس، 2021 الوسوم:

امي جانت تلح على بابا جيب احد يشتغل وياك جيب احد يشتغل وياك …. ابوية جان ميقبل و يكول اني وحدي اكدر امشي امور الصيدلية …
وطبعا يتورط بابا يكول راسي يوجعني لو ايدي توجعني … أمي رأسا تكله صوجك جيب احد يشتغل وياك … شلون بهذا الزمن من واحد يكول عيوني توجعني لو راسي يوجعني و رأسا الام تكول من ورى المهجوم الي بيدك (وطبعا المهجوم معناته الموبايل) امي جانت هيج بس الاختلاف بذاك الوكت جان السبب الوحيد الي يخلي ابوية يتأذه هي الصيدلية الي وحده يشتغل بيها … ابوية صيدلاني و امي موظفة بدائرة خدمية … هالحجي بقيت اسمعه من أمي لحد ما صار عمري ١٩ سنة … طبعا اني الجبيرة على اخوتي الولد الاثنين … حتى الصيدلية على أسمي ابويه مسميها (صيدلية الايمان) اني ايمان … من صار عمري ١٩ قررت اروح وي بابا للصيدليه اساعدة … و بديت اروح وياه مرات …. ابوية فقير كلش من ناحية الشخصية … يعني شخصيته فقيرة و مودبة و يحترم الصغير قبل الجبير …. الصيدلية مالتنا جانت بنص شارع عام و الشارع كلش هوسة … ابوية الكل يعرفه … الي تبيع مخضر تعرفه و الي يبيع ملابس يعرفه و الي يبيع لبلبي يعرفه و الي يبيع جكاير يعرفه …
كلهم يسلمون عليه من يجي و كلهم يصيحوله عمي ابو ايمان …. المنطقة شعبية جانت .. من شافوني وي بابا واكفة بالمحل و طبعا اني قبل جاية وي ماما بس مباقية وقت طويل مثل هسه … من شافوني وي بابا كلهم يجون يسلمون عليا و كلهم يمدحون ببابا (ابوج احسن رجال و ابوج طيب و الله يحفظلج هالاب الذهب) … كلش كيفت من شفت الناس هيج تحب بابا … و جنت احسهم يعتبرون بابا دكتور اخصائي بكل شي … يعني الي صدره يوجعه يجي يسأله .. والي عظامه توجعه يجي يسأله … بكل شي يسألون بكل شي … و مرات بابا ينطيهم علاج ومرات ينطيهم عنوان دكتور اخصائي بالمجمع الي بصفنه يكشفون عنده لان مو كل شي ينعرف من الحجي … و بديت سنه ورى سنه اروح وي بابا و اني اصلا اختصاصي بعيد كل البعد عن الصيدله بس من ورى بابا تعلمت كل شي عن الادوية و كمت اقرا الوصفات و اعرف المطلوب و طبعا ابوية بالبداية جان يوكف ورايا يباوع عالورقة و يشوف كلامي وي المريض يعني (هالعلاج تلث مرات باليوم بعد كل وجبه لو هالعلاج مره وحده لو هالعلاج لازم يندهن بعد الغسل) و اذا اخربط هو يعدل من يمه و يحجي بمكاني … ومثل مكلت بالممارسة كام اصلا يبقى كاعد عالكرسي و يقرا جريدة لو يحل كلمات متقاطعة و اني الي ابيع و انطي التعليمات …
يعني صرت خبرة تقريبا …
و فترة بابا تمرض واني كمت اروح وحدي للصيدليه افتح … طبعا واحد من اهل البسطيات سألني على بابا و كلتله مريض و هو راح كال للكل و كلهم كامو يجون يسألوني عليه و يدعوله و يدزون سلام بيدي … و من يفوت ولد شاب وحده للصيدليه اشوفهم يباعون عالمحل لان الباب كزاز و ينشاف شيصير وراه و اكو بيهم يتقربون عالصيدليه يخافون لا يطلع مو زين لو حرامي لو جاي يدور صداقة لان بكل مكان اكو هيج امور … بس مصادفتني ابد سالفة سرقة بس مرات يسمعوني حجي سوالف مراهقين يعني …
المهم .. بابا رجع للشغل و طبعا اني وياه وياه … و مشت كم سنة و كملت كليتي بس متوظفت بشهادتي … بقيت وي بابا اشتغل و اخوتي هم كبرو دخلو متوسطات .. و الشغل جان زين ومطلعين عيشتنا احنا … وبيوم من الايام تقدملي ولد من معارف بابا … ابوه يصير صديق بابا … الولد مهندس و محترم كلش … و عمره قريب من عمري … ابوية و امي موافقين و طبعا كالولي بكيفج و وافقت بس شرطت عليه ابقى اشتغل وي بابا لان اني الجبيرة و بابا ميكدر وحده لان شوية كبر … وافق الولد و تزوجت … و ورى الزواج بكم شهر رجعت للشغل وي بابا … بس رجلي كمت احسه مثل الي يتنحس … حجيت لأمي كالت بنتي خلي واحد من اخوتج يشتغل وي ابوج و يتعلم مثل ما انتي تعلمتي و انتي رجلج الظاهر حجاها حجاية و ميدري راح تسويها صدك … و بده اخوية يجي و اني اعلم بي بس اخوية وكح و لسانه محلو … يعني يتعامل وي الناس عبالك يشتغلون عنده … اني و ابوية ما قبلنه على اسلوبه و رجعناه للبيت مع العلم امي تكول اخوج يتقصد يسوي هيج حتى ميلتزم بسالفة الصيدلية لان روحه بالطوبة … و صدك جان ينام و يكعد كبل يروح للملعب و غرفته كلها صور لاعبين مال طوبه و لبسه كله رياضي و كل اسبوع يروح لعبة بمنطقة من مناطق بغداد و مرات يروح خارج بغداد .. و الصغير مدلل و هم ميعجبه هالسوالف …
كلتله لبابا زين ليش متشغل وياك واحد ثقة من هالناس الي يشتغلون هنا … ابوية كال بنتي هالشباب اتوقع علمود العيشة اغلبيتهم بدون شهايد و عايفين المدارس و الشغلة يرادلها واحد قاري و فاهم … و اني ما اجيب حي الله واحد .. و بنفس اليوم دخل ابو بسطية مال فرفروي و جدورة و شغلات مال مطبخ نعرفه و جبير بالعمر و صارله كم سنة مفتح هنا بنفس الشارع و يعرف ابوية و كلش حباب اسمه ابو عبدالله … اجه يريد علاج و سألته كلتله عمو متعرف احد خريج صيدله لو خريج و يريد يشتغل … كال عمار و حمزة ثنينهم خريجين بس مو صيدله واحد ماعرف شنو مخلصين بنتي … طبعا عمار و حمزة عدهم بسطية مال ملابس اطفال و سوالف مال محجبات يعني ربطات و عبي … و اعرفهم اني و كلش فقره الولد و دائما يسلمون بس اول مرة نعرف اني و بابا هالشباب خريجين كليات والله العظيم … ابوية صاح حمزة و ساله طلع خريج اداب انكليزي و عمار خريج زراعة … حمزة اكبر مني بسنتين و سالته شعجب ممتوظف .. كال لا والله الوظيفة متخدمني و انتي اختي و عمي ابو ايمان مثل ابوية اني و عمار بركبتنا ٤ بنات و ابوي ميت و البيت ايجار و الوظيفة راتبها قليل (بذاك الوقت يعني) و هنا خير من الله مطلعين عيشتنا و نتبادل اني و عمار بالشغل و ثنينا نشتغل صبغ و زخرفه و نقوش مغربية و هالشي ورثنا من ابوية لان ابوية جانت هاي شغلته (الله يرحمه) و طالعه عيشتنا الحمدلله … ابوية كالة اني محتاجك حمزة .. كاله عمي ابو ايمان ركبتي جوى ايدك اامرني … كاله اريدك وياي هنا تشتغل لان ايمان تزوجت و بعد متكدر تجي هنا و اني كبرت و ولدي الله يحفظهم مو مال شغل … و انته خريج انكليزي يعني شوية تكدر تساعدني بس يرادلك وقت اعلمك شغلات … كال تدلل عمي صدك جذب … و البسطية اجيب ولد يوكف بيها … و صدك والله اشتغل وي ابوية و لان الولد ابن سوك و خريج تعلم بسرعة و كام يساعد ابوية و اني امنت بعد على بابا ..
و بقيت بالبيت يم رجلي .. زوجي للأسف طلع يدور نسوان … و هالشي ابد ممبين عليه … و فوك ميدور نسوان طلع شكاك … يعني من جنت احجي بالتلفون و يجي يسألني ويامن جنتي تحجين .. مثلا اكله وي صديقتي سجا … يكلي انتي دكيتي عليها لو هي دكت عليج .. اني اول مرة من سألني هالسوال عبالي بخيل و علمود قائمة التلفون ديسأل هالسوال بس طلع شيسوي .. من اكله اني دكيت من اسد الاتصال يرجع يدوس الدكمة الي بالدكم تعيد الاتصال بأخر رقم دكيته (يعني دكمة التكرار) … و يبقى ساكت .. يشوف صدك اني جنت احجي وي سجا لو اجذب عليه … من عرفت هالشي بعد عركة جبيرة كلتله زين افرض اخوها جاوبك لو ابوها جان شسويت … كال جان سألت بيت ابو سجا … كلتله و اذا كالولك اي .. كال اسده طبعا .. كلتله يعني بشرفك بناموسك تقبل واحد يخابر على بيت اهلك يكول بيت ابو زينه (اخته اسمها زينه) و من يكولوله اي يسده .. شراح تسووون لزينه بله ؟؟
كالي عادي بس هو جذاب مو عادي … و مره مرتين لكفته يحجي وي بنات عن طريق الصدفه … البيت بي جهازين تلفون .. واحد فوك و واحد جوى بس ثنينهم نفس الخط … مرة شلت السماعة و سمعته ديحجي وي وحده وهو عباله اني نايمه … و تعاركت وياه و حلف علساس هاي حبيبة صديقة و متعاوفين و يريد يرجع علاقتهم علساس طباب خير … و كلتله سمعتك تحجي وياها كلمات حب .. دخل بعيني و بذاك الوكت حرمات مجان اكو تلفون حديث يسجل الحجي …. و ثاني مرة هم لكفته و هم دخل بعيني و كال هاي مهندسة و شغل بيناتنا … و مرة لكيت بالسيارة كلينكس (منديل) بي حمره و طبعا اني متاكده الي جانت صاعده وياه هي ذبته حتى تسوي مشكلة بيني و بينه … لان ذابته بمكان ينشاف اذا واحد كعد بصف السايق … و بديت اتخبل وبذاك الوقت جنت حامل و من المشاكل الجنين راح … و مرة خابرت وحده على رقمنا و طلبته بالاسم و هنا جان اول مرة بحياتي واحد يمد ايده عليا … عمري كله بابا ما ضربني و اني جبيرة اخوتي … بس انضرب هاي صعبة … ضربني و سمعني كلام كلش سخيف و اني كبل رحت لبيت اهلي …. و طبعا كل السوالف القديمة محاجيتها لابوية لان اكول هسه يتغير رجلي … و حجيت كل شي لابوية كالي المفروض من اول مرة تحجيلنا الي ديصير … و صارت كعدة و بكل عين صلفه يكول لبابا بنتك تتخيل سوالف مصايرة و تطلع امور مموجوده اصلا .. بابا كاله يعني بنتي مخبله .. كاله مو هيج بس شكاكه و تتخيل امور و ترسم قصص براسها … ابوية كاله كله ماشي بس شلون تمد ايدك على بنتي … كاله صارت بعد … ابوية كاله لك اني ابوها مماد ايدي عليها انته تجي تضربها و كام يصيح عليه و هو هم صيح على بابا و كاله خلص عوفها الكم بعد ماريدها و انفصلت ..
و بكل دم بارد طلكني … طلكني بدون تردد … عبالك جان ينتظر تصير مثل هيج مشكلة حتى يتخلى عني … و اني ما اكول مهتميت و ما انقهرت بس شسوي هاي قسمتي … و قررت ارجع للشغل وي بابا و طبعا جان حمزة واكف بعيني بس بابا كالي ترى حمزة يريد يعوف الشغل بس مستحي و من سمع انتي انفصلتي كال خلي تجي لعد هنا وياك لان اني بصراحة اريد اخذ محل افتحه البسه اطفال و البسطية تبقى يشتغل بيها العامل و اوسع شغلي و المحل بصفنا مو بعيد … يعني بعد محلين عن الصيدلية … و صدك والله اخذو المحل حمزة و عمار و بدو يرتبوه و فتحو اسواق و اني رجعت وي بابا اشتغل …. و مرت فترة و اني وي بابا … و بابا توفى ورى سنتين من انفصالي (الف رحمه على روحه) و بقيت اني بالصيدليه بس جبت وياي بنية صيدلانية من منطقتنا … و اخوتي كل واحد ملتهي بروحه و اني جنت حالي حال بابا وياهم … يعني الي يريدوه ياخذوه … و طبعا كبرو و صارو رياجيل … و بقيت اني منفصلة و تمشي السنين و البنية الي تشتغل وياي تزوجت و صار عدها طفل و مرات تجيبه وياها للصيدلية … جنت مرات اتمنى لو مصاير عندي اسقاط و جان هسه عندي طفل جبير و اعتني بي … بس قسمتي و قدري … و اخوتي طبعا لا شغل و لاعمل و دخلنا بزمن الانترنت و التلفونات الحديثة و امي بوقتها راتبها التقاعدي كله للولد لان طلباتهم هواي و من عده راتب ماما اني انطيهم بس ماعرف شسوي كل شي ميكفيهم …
و ميفكرون ابد يساعدوني … والصغير من كبر صار همه الوحيد السفر … ينام يكعد اريد اسافر … و كلناله السفر يرادله فلوس .. كال مو مشكلة نبيع البيت لو نبيع الصيدليه و نوزع الحصص … بوقتها اني غلطت عليه و كمت ابجي … و هو رجعلي الغلطه بعشره … و امي طبكت وياه … سكتت و رحت لحمزة بوقتها كلتله اريد سلفة ام الدفتر … و شافلي خطية عن طريق اخته وحده بمنطقتهم تسوي سلف و اشتركت وياها و طلبت يسلموها اليا اول اسم … و استلمتها و انطيتها لاخوية و امي هم انطته وراح … طلع للسويد … و اخوية الاكبر منه يريد يتزوج … كلتله زين هسه اذا رحنا لبيت حبيبتك و ردنا نطلب ايدها ميسألون ابنكم شنو شغله … شنكلهم ؟؟؟ على اقل اشتغل … يكول اشو انتي تريدين تعرقلين سالفتي لان عندج عقده من الزواج بسبب فلان (يعني بسبب طليقي) كلتله انته شدتحجي … كال لعد شنو مينطون عود كوليلهم اني الي لازم الصيدليه قابل راح يطلعون كشف دلاله مثل الشرطه حتى يشوفون صدك لو جذب … كلتله و اذا سالو بالمنطقة شلون … كال ميسالون .. كلتله انته شمدريك … كال بابا البنية ابوها منفصل عن امها … و اخوه ولد ماعدها .. هي و خواتها بنات ثنين و كاعدات ببيت عمتهم و عمتهم هم خلفتها بس بنات و رجل عمتهم لا يحل و لا يربط … كلتله زين ورى الزواج شلون تعيشها … كال اللكمة الي ناكلها هي تاكلها لحد ما الكه شغل و طبعا هو هالحجاية مال الكه شغل سامعتها من عنده خمسين الف مرة و بحياته ما اشتغل … كلتله زين ..
و رحنا خطبناها و اشو اهل البنية عبالك بس يريدون يدفعوها … و بنفس الشهر زوجناه … و طبعا هالحجي هم تداينت و رتبتله غرفة تخبل … و عرس سويناله … و كيفنا بي لان شمهما يكون هذا اخوية … و فرحناله و البنية اول ايام جانت فقيرة و حبابه …و ماكو بس عبرت خمس لو ست اشهر من الزواج … اخوية رجع يروح لعبات مال طوبة بس ميلعب بس يتابع و بنفس الوقت رجع يسهر بره وي جماعته بمطاعم و كافتريات و كعدات مال نركيلة و كوفي و كازينو و هالسوالف … و بيوم من الايام رجعت من الصيدليه امي صاحتني … بس شكل امي مو طبيعي … كلتلها شبيج … كالت فوتي للغرفة و سدي الباب … فتت جان تكلي فلانة (زوجة اخوية) مصادقه على اخوج واحد … ضربت وجهي كلتلها صخام و انتي شلون عرفتي ؟؟ كالت الانترنت فوك مو قوي … و اني جنت نايمه بالصالة هي نزلت بالحديقة كعدت … و شباك الصالة مال المبردة القديمة بي سيم و مفتوح دائما .. كمت اني سمعتها تهمس و فاتحه كامرة …
و بالكامرة ولد يحجي وياها و سمعت صوته … و بالغلط حركت القنفه هي سمعت الصوت رأسا سدته و فاتت جوى .. شافتني بالصالة كالت ها عمه محتاجه شي و كامت بس تسألني شنو اريد … و هسه اني خايفة اخاف اكول لاخوج و يسويلنه مصيبة لان اخوج دمه نار … كلتلها لا يمه عفيه لا تكوليله … لان خفنا كلش ..
و بنفس اليوم رجع اخوية بليل كلش .. جان يجي يكعد امي .. كالها مو عيب هاي سوالف الزعاطيط و سوالف الافلام المصرية تتسنطين على زوجتي من تحجي بالتلفون وي اهلها … امي لزمتها العبره و طبعا اني فزيت على صياحه … امي صعد السكر عدها رأسا و كامت تبجي .. كلتله شنو زوجتك كالتلك هالحجي … كال و انتي شعليج محاجي وياج .. كلتله احترم امي و لا تحجي هيج وياها … جان يغلط عليا و كلتله مرتك جانت تحجي وي رجال و امي خافت تكلك … جان يضربني و يكفخ براسي اكثر من سبع مرات من الضرب دخت و تخربطت … و امي تصيح … و صحيت على صوته يصيح باجر اروح للدلال و ابيع هالمهجوم و كل واحد ياخذ حصته و اطلع من شكولاتكم الزفره (مكرم القارئ) و للصبح ما نمنا اني وامي و خابرت البنية الي تشتغل بالصيدليه و كلتلها اني ماكدر اجي … لان وجهي مزرك … و بنفس اليوم خابرني حمزة … كالي خير ليش مجاية .. كلتله فلوس السلفة يم فلانة و اني هالاسبوع كله ما اجي … و بقى يلح و الولد ثقه و حلفني بروح بابا شكو … حجيتله كل شي … جان يكول خلي اجي احاجي بلكي ااثر عليه … كلتله لا فدوة لا يسمعك حجي مو حلو … و صدك والله اتصل بأبو السويد و طلب منه يسوي وكاله عن طريق السفارة و ما عبر شهرين على هالشي و جان ينباع البيت … و هو اخذ حصته و حول حصة الصغير عن طريق واحد عراقي و اني انطوني حصتي و امي وياي و اجرت بيت بنفس منطقة الصيدليه و طبعا ثنينهم دفعتلهم حصتهم من الصيدليه من حصتي … و خطية حمزة و اخوه جوي ساعدونا بالتحويله … و همه من نفس المنطقة و جابو خواتهم و كرايبهم و شكو مرية بالسوك اعرفها جتي بيوم التحويلة حتى تساعد و جابو اكل عبالك اني بنتهم و راحو افترو عالجوارين وصوهم عليا و على ماما ….
و عشنا بهل البيت … طبعا جان عندي فلوس من حصتي بس كلت بعد اصمد فوكاها حتى اخذلي مشتمل صغير الي و لماما … و ماعبر على كعدتي سنه و جانت احلى سنه بحياتي لان ما بيها مشاكل ابد … بس امي تبقى ام … تخابر على اخوية وميجاوبها لان يكول طعنت بشرف زوجتي … و جانت كل شوية تبجي واني اصبرها … و بيوم من الايام امي جتي للصيدليه مشي … اني كلت عادي تتسوك لو يعجبها تتمشى لان البيت الجديد قريب كلش عالصيدليه … جان تفوت جوى و كالتلي اجتي اخت حمزة الجبيرة و قبل شوية طلعت … كلتلها خير شكو قبل شوية شفت حمزة اشو مكالي … كالت حمزة تقدملج … كلتلها الرجال ميتعيب و خوش رجال بس اني بعد تجربتي للزواج الاولى مستحيل اتزوج و شي ثاني انتي ماعوفج … كالت بنتي اني مدايمتلج … كلتلها لا لا لا … تلاثه لا كافي .. ضحكت امي و كالت زين و بقت كاعده يمي شوية و راحت … و وراها بيومين حمزة اجاني كالي ليش هيج اني شمسويلج و جان يضحك … كلتله لا والله حمزة ممسويلي شي بس اني جربت حظي و ماريد … كال بس مجربتي حمزة … كلتله انته خوش رجال و ابن اوادم و وكفاتك حلوة بس ماريد اندم … كال والله متندمين … كلتله زين افرض وافقت و امي شلون … كال يمعوده ماكو اسهل منها… المشتمل الي بصف بيتكم مال بيت ام ميثاق ام الغذائية … فارغ و تريد تأجرة و لزك ببيتكم … ارتبه عالسريع و اصبغة و نتزوج بي و بصف خاله … لزك حايط عالحايط … كلتله بكل شي مفكر … كال بكل شي … و قبلت و تزوجنا و بالكوه قنعته ما نسوي عرس لان يريد يسوي عرس … و الرجال هلكد مو محترم وياي والله العظيم اتخيل اني بحلم مو حقيقة … يعني المرية بصورة عامة تحلم دائما برجال (مو شكل و لا فلوس و لا قيمة علمية يعني شهاده ) بس تحلم برجال … تحلم برجال حايط .. حايط داير مدايرها يحميها و بنفس الوقت من تخلي راسها عالحايط يصير انعم من ريش النعام … و حمزة هيج … حمزة ابن سوك و خريج .. و الناس تحترمه بكل مكان … يصيح لأمي يمه .. و شايلها على جفوفه .. و مرات بنص الليل اذا يسمع طكطكه يكمز كبل لبيت امي ..
مع العلم المنطقة رغم ما شعبية بس كلش امنه .. و للأسف الله ما رزقنا بالبداية بجهال … و بعد المراجعات جان اكو خلل و انحل الحمدلله و هسه اني حامل و حمزة قافل عليا ما اسوي سونار يكول حتى يجيني كعبول قابل المهم طفل مو مهم بنية لو ولد … و الحمدلله عايشة برحمة و خير .. و رزق .. و ماكو اي مشاكل و اخوية ابو السويد اخذ الاقامة و تزوج اجنبية و للأسف اخوية الي هنا لهذا يوم الله ميحجي ويانه .. و اخيرا .. الله يرزق كل النساء برجال … و من اكول رجال ما اقصد لبس لو اناقة لو شكل لو شهادة … رجال … رجال من تنام المرية يمه متخاف لو تنكلب الدنيا عشر مرات … و الاهم من كل شي .. يرزق كل وحده منتظرة طفل يرزقها بالخلف الصالح … و الاهم يطول عمر الاب اذا موجود .. و يحفظ امهاتكم …

المصدر : صفحة ابو بغداد



Source link

Comments


اترك تعليقاً


لن يتم نشر عنوان بريدك الإلكتروني. الحقول الإلزامية مشار إليها بـ *